अमेरिकी राष्ट्रपति Donald Trump ले पूर्वराष्ट्रपति Barack Obama लाई पक्राउ गर्न माग गरिएको एउटा विवादास्पद पोस्ट आफ्नै सामाजिक सञ्जाल Truth Social मा सेयर गरेका छन्। कुनै प्रमाण प्रस्तुत नगरी ओबामामाथि “देशद्रोह” जस्तो गम्भीर आरोप लगाइएको उक्त पोस्टलाई ट्रम्पले पुनः साझा गरेपछि अमेरिकन राजनीतिक वृत्त फेरि तातेको छ।

The Washington Post का अनुसार ट्रम्पले चीन भ्रमणका लागि प्रस्थान गर्नुअघि लगातार विभिन्न पोस्टहरू गरिरहेका बेला उक्त सामग्री पनि साझा गरेका थिए। पोस्टमा सन् २०१६ को अमेरिकी निर्वाचन अभियानका क्रममा ओबामा प्रशासनले ट्रम्पमाथि जासुसी गरेको पुरानै आरोप दोहोर्‍याइएको थियो।

पोस्टको अन्त्यमा निकै आक्रामक भाषा प्रयोग गर्दै लेखिएको थियो:
“सबैलाई पक्राउ गर। सबैमाथि मुद्दा चलाऊ। धोखाधडी, देशद्रोह र अमेरिकी सरकार ढाल्ने षड्यन्त्रका लागि सबैलाई जेल हाल। तर सबैभन्दा पहिले बाराक ओबामालाई।”

उल्लेखनीय कुरा के छ भने, सन् २०१६ मा ट्रम्प पहिलोपटक राष्ट्रपति पदका लागि चुनाव लड्दा ओबामा नै अमेरिकी राष्ट्रपति थिए। त्यसयता ट्रम्पले बारम्बार ओबामा प्रशासनमाथि आफूविरुद्ध षड्यन्त्र गरिएको आरोप लगाउँदै आएका छन्, तर ती दाबीहरू पुष्टि हुने ठोस प्रमाण सार्वजनिक हुन सकेको छैन।

यो पहिलो पटक भने होइन, जब ट्रम्पले ओबामालाई लक्षित विवादास्पद सामग्री साझा गरेका हुन्। गत वर्ष जुलाईमा उनले ओबामालाई ओभल अफिसमै गिरफ्तार गरिएको देखाउने एआईबाट बनाइएको नक्कली भिडियो पनि रिपोस्ट गरेका थिए। उक्त छोटो भिडियो सुरुमा TikTok मा पोस्ट गरिएको थियो, जसलाई पछि ट्रम्पले ट्रुथ सोसलमार्फत पुनः साझा गरेका थिए।

त्यसअघि फेब्रुअरी महिनामा पनि ट्रम्प विवादमा तानिएका थिए। उनले एआई प्रयोग गरेर बनाइएको अर्को भिडियो पोस्ट गरेका थिए, जसमा ओबामा दम्पतीलाई बाँदरको रूपमा चित्रण गरिएको थियो। भिडियोमा ट्रम्पलाई सिंहको रूपमा प्रस्तुत गरिएको थियो भने डेमोक्र्याट नेताहरूलाई उसका सहयोगी पात्रका रूपमा देखाइएको थियो।

भिडियोको अन्तिम भागमा पूर्वराष्ट्रपति ओबामा र उनकी पत्नी Michelle Obama को टाउको जोडेर बाँदर नाचिरहेको जस्तो दृश्य समावेश गरिएको थियो। उक्त सामग्री सार्वजनिक भएपछि ट्रम्पमाथि जातीय विभेद र नस्लवादी मानसिकता प्रदर्शन गरेको आरोप लाग्यो। व्यापक आलोचनापछि भिडियो करिब १२ घण्टामै हटाइएको थियो।

ट्रम्पका यस्ता गतिविधिले अमेरिकी राजनीतिक वातावरणमा थप ध्रुवीकरण ल्याएको विश्लेषण भइरहेका बेला उनका समर्थक र विरोधीबीच सामाजिक सञ्जालमा तीव्र बहस समेत सुरु भएको छ।

(विभिन्न अन्तर्राष्ट्रिय सञ्चार माध्यमहरूको सहयोगमा तयार पारिएको )