नेकपा एमालेका उपाध्यक्ष विष्णु पौडेल लाई सम्पत्ति शुद्धीकरण अनुसन्धानसम्बन्धी प्रक्रिया अघि बढेपछि प्रहरीले सुर्खेतबाट पक्राउ गरेको छ।
कर्णाली प्रदेश प्रहरी प्रमुख एवं डिआइजी जयराज सापकोटाका अनुसार सम्पत्ति शुद्धीकरण अनुसन्धान विभागबाट प्राप्त पत्राचारका आधारमा उनलाई नियन्त्रणमा लिइएको हो। “सम्पत्ति शुद्धीकरणको कसुरमा अनुसन्धानका लागि विभागले पत्र पठाएको थियो। सोही पत्रअनुसार हामीले पक्राउ गरेका हौं,” उनले बताए।
पौडेललाई सुर्खेतस्थित एक होटलबाट साँझ करिब ५:३० बजे पक्राउ गरिएको जनाइएको छ। पक्राउपछि उनलाई प्रारम्भिक प्रक्रिया पूरा गर्न बाँकेको नेपालगञ्जतर्फ लगिएको छ।
प्रहरीका अनुसार सम्भव भए आजै बेलुकी उनलाई विमानमार्फत काठमाडौं स्थानान्तरण गर्ने तयारी गरिएको छ।
हालसम्म उनीमाथि लागेका आरोप तथा मुद्दासम्बन्धी विस्तृत विवरण सार्वजनिक भइसकेको छैन, र अनुसन्धान प्रक्रिया जारी रहेको बताइएको छ।
