Bhutan र Singapore बीच दोहोरो कर उन्मुक्ति सम्झौता सम्पन्न भएको छ। मे १२, २०२६ मा सिङ्गापुरमा हस्ताक्षर गरिएको उक्त सम्झौताले दुई देशबीच लगानी, व्यापार तथा आर्थिक सहकार्यलाई थप मजबुत बनाउने विश्वास गरिएको छ। साथै, गेलेफु माइन्डफुलनेस सिटीको अन्तर्राष्ट्रिय महत्वाकांक्षालाई समेत यसले महत्वपूर्ण सहयोग पुर्‍याउने अपेक्षा गरिएको छ।

आयमा लाग्ने करसम्बन्धी दोहोरो कर उन्मुक्ति तथा वित्तीय छल रोकथामसम्बन्धी सम्झौतामा भुटान सरकार र गेलेफु माइन्डफुलनेस सिटीको तर्फबाट भुटानका अर्थमन्त्री Lekey Dorji ले हस्ताक्षर गरेका हुन् भने सिङ्गापुर सरकारका तर्फबाट जेफ्री सिओले सम्झौतामा हस्ताक्षर गरेका थिए।

यो सम्झौता भुटानको तेस्रो द्विपक्षीय कर सन्धि हो। यसलाई भुटानले आफ्नो अन्तर्राष्ट्रिय आर्थिक तथा कर सहकार्यको दायरा विस्तार गर्ने रणनीतिक प्रयासको महत्वपूर्ण उपलब्धिका रूपमा हेरिएको छ।

सम्झौताले सीमा पार आर्थिक गतिविधिबाट प्राप्त आम्दानीमा दुवै देशको कर अधिकारलाई स्पष्ट बनाउनेछ। दोहोरो करको जोखिम कम हुँदा लगानीकर्ताको विश्वास बढ्ने, व्यापार तथा वैदेशिक लगानी प्रवाह विस्तार हुने र दुई देशबीचको आर्थिक सम्बन्ध अझ गहिरिने अपेक्षा गरिएको छ।

सम्झौतामा करसम्बन्धी सहकार्यका विषय पनि समावेश गरिएको छ। यसअन्तर्गत सूचनाको आदानप्रदान, कर छल नियन्त्रण तथा अन्तर्राष्ट्रिय मापदण्डअनुसार सन्धिको दुरुपयोग रोक्ने प्रावधान राखिएको बताइएको छ।

यो सम्झौता विशेषगरी Gelephu Mindfulness City का लागि महत्वपूर्ण मानिएको छ। अन्तर्राष्ट्रिय लगानीकर्ता, वित्तीय संस्था, कम्पनी, पारिवारिक लगानी कार्यालय तथा व्यावसायिक सेवा प्रदायकलाई आकर्षित गर्न आवश्यक संस्थागत र नियामकीय संरचना निर्माण गरिरहेको गेलेफु माइन्डफुलनेस सिटीका लागि यसले थप विश्वासिलो वातावरण बनाउने अपेक्षा गरिएको छ।

भुटानले गेलेफु माइन्डफुलनेस सिटीलाई दक्षिण एशियामा दिगो विकास, नवप्रवर्तन र क्षेत्रीय सम्पर्क विस्तार गर्ने दीर्घकालीन आर्थिक केन्द्रका रूपमा अघि बढाइरहेको छ।

गेलेफु माइन्डफुलनेस सिटीका प्रमुख Lotay Tshering ले सम्झौतालाई गेलेफु माइन्डफुलनेस सिटीका लागि महत्वपूर्ण कोशेढुंगा भएको बताएका छन्। उनका अनुसार सिङ्गापुरजस्ता अन्तर्राष्ट्रिय स्तरमा विश्वासिलो मुलुकबाट प्राप्त मान्यताले दक्षिण एशियाको आर्थिक केन्द्र बन्ने गेलेफुको यात्रालाई थप बल पुर्‍याएको छ।

अर्थमन्त्री लेके दोर्जीले पनि सिङ्गापुरप्रति सहकार्य र विश्वासका लागि आभार व्यक्त गरेका छन्। उनले सानो भूगोल भए पनि विश्व अर्थतन्त्रमा सिङ्गापुरको प्रभाव र विश्वसनीयता अत्यन्त ठूलो रहेको उल्लेख गर्दै भुटानका लागि सिङ्गापुर महत्वपूर्ण साझेदार भएको बताए।

उनका अनुसार यो सम्झौताले गेलेफु माइन्डफुलनेस सिटीसम्बन्धी राजकीय दूरदृष्टि तथा भुटानको दीर्घकालीन आर्थिक विकासको लक्ष्यलाई सशक्त आधार प्रदान गर्नेछ।

यो सम्झौताले भविष्यमा भुटान र सिङ्गापुरबीच सीमा पार लगानी, आर्थिक सहकार्य तथा दीर्घकालीन साझेदारीका लागि कानुनी र वित्तीय आधार अझ मजबुत बनाउने विश्वास गरिएको छ।