वर्षाका कारण १० ओभरमा ७८ रनको संशोधित लक्ष्य पाएको यूएईले नेपाललाई ६ विकेटले पराजित गरेको छ। यूएईले ७ बल बाँकी रहँदै लक्ष्य पूरा गर्दै जित निकालेको हो।
त्रिवि अन्तर्राष्ट्रिय क्रिकेट रंगशाला, कीर्तिपुरमा भएको खेलमा यूएईका कप्तान मोहम्मद वासिमले आक्रामक सुरुवात गर्दै मात्र १५ बलमा ३३ रन बनाए। उनले पहिलो ओभरमै डेब्यु गरिरहेका हेमन्त धामीमाथि आक्रामक प्रहार गर्दै २० रन जोडेका थिए।
नेपालका लागि सन्दीप लामिछानेले उत्कृष्ट प्रदर्शन गर्दै वासिम (३३ रन), अबिद उसमानी र हरप्रित सिंहलाई आउट गरेका थिए। कुशल मल्लले पनि एक विकेट लिएका थिए।
यसअघि टस जितेर पहिले ब्याटिङ गरेको नेपालले १८.५ ओभरमा १२२ रन बनाएको अवस्थामा वर्षाले खेल प्रभावित भएको थियो। त्यसपछि डकवर्थ–लुइस–स्टर्न (DLS) विधिअनुसार यूएईलाई १० ओभरमा ७८ रनको लक्ष्य दिइएको थियो।
यूएईका लागि अलिसान सराफु र अक्क्षदिप नाथले पनि महत्वपूर्ण योगदान दिए भने सोहेव खान अविजित रहँदै टोलीलाई जित दिलाए।
