झापा, पूर्वाञ्चल दैनिकका सह सम्पादक सुरेन्द्र भण्डारीलाई षष्टिका वस्नेत सूचनाको अधिकार प्रोत्साहन पुरस्कार प्रदान गरिएको छ ।
२५ हजार २५ रुपैयँँ पुरस्कार राशिको सो पुरस्कार भण्डारीलाई कोशी प्रदेश सरकारका मुख्यमन्त्री हिक्मतकुमार कार्की र विराटनगर महानगरपालिकाका प्रमुख नागेश कोइरालाले संयुक्त रुपमा प्रदान गरे ।
विश्व प्रेस स्वतन्त्रता दिवसको अवसरमा नेपाल पत्रकार महासंघ मोरङ शाखाले आयोजना गरेको पुरस्कार वितरण र अग्रज पत्रकार सम्मान कार्यक्रमकाबीच भण्डारीलाई पुरस्कृत गरिएको थियो । भण्डारी सूचनाको हकका लागि राष्ट्रिय महासंघ कोशी प्रदेशका महासचिव समेत रहेका छन् ।
विगत डेढ दशकदेखि सक्रिय पत्रकारिता गरिरहेका भण्डारी राष्ट्रिय समाचार समिति र इमेज टेलिभिजनमा समेत आवद्ध छन् ।
यसैबीच एक लाख एक सय रुपैयाँ पुरस्कार राशिको षष्टिका वस्नेत सूचनाको अधिकार पुरस्कार पत्रकार किशोर वुढाथोकीलाई प्रदान गरिएको थियो । सो पुरस्कार मुख्यमन्त्री कार्की र बिराटनगर महानगरपालिकाका प्रमुख कोइरालाले संयुक्त रुपमा कार्कीलाई प्रदान गरेका थिए ।
पुरस्कृत वुढाथोकी सूचनाको अभियन्ता हुन् भने उनी अन्नपूर्ण दैनिकमा आवद्ध छन् ।
बिराटनगरका समाजसेवी केदारबहादुर बस्नेतले आफ्नी श्रीमती षष्टिका वस्नेतको स्मृतिमा पुरस्कार स्थापनाका लागि नेपाल पत्रकार महासंघ मोरङ शाखामा कोष स्थापना गरेका थिए ।
२०७३ सालमा स्थापित सो कोषको व्याजबाट सूचनाको हकका लागि काम गर्दै आएकाहरुलाई पुरस्कार प्रदान गरिँदै आएको छ ।
यसैबीच पत्रकार महासंघ मोरङले विश्व प्रेस स्वतन्त्रता दिवसको अवसरमा ६० वर्ष उमेर पुगेका पत्रकार यज्ञ शर्मालाई सम्मान गरेको छ । सम्मानित शर्मालाई मुख्यमन्त्री कार्कीले प्रशंसापत्र प्रदान गर्दै खादा, माल लगाएर सम्मान गरेका थिए । त्यस्तै महासंघ मोरङले तयार पारेको क्यालेण्डर महागर प्रमुख कोइरालाले लोकर्पण गरेका हुन् ।
नेपाल पत्रकार महासंघ मोरङ शाखाकी अध्यक्ष सुशीला पाठकको अध्यक्षतामा भएको कार्यक्रममा प्रमुख अतिथि मुख्यमन्त्री कार्की सहित विशेष अतिथि विराटनगर महानगरपालिकाका प्रमुख कोइराला , नेपाल पत्रकार महासंघ कोशीका अध्यक्ष भरत खड्का, पूर्व अध्यक्ष विक्रम लुइँटेल, लीलावल्लभ घिमिरे, षष्टिका वस्नेत कोषका संरक्षक केदान वस्नेत लगायतले शुभकामना मन्तव्य राखेका थिए ।
